ابدء تجارتك الالكترونية الان - الجزء الثاني

الجزء الثاني من ابدء تجارة الالكترونية
تقدر تشوف الجزء الاول من هنا

يعني هتتاجر في ايه, ايه البضاعة اللي انت هتبيعها
وخد بالك الموضوع ده مهم جدا جدا....
انك لازم تكون فاهم المنتج بتاعك ده هايتباع امتى؟.. دورة حياته يعني..
في انهي شهر أو موسم؟
امتى تزود عليه منتجات تانية؟
وامتي تغيره أو تجدده؟
هل هتجيب حاجات جملة وتتاجر فيها؟
لازم تحسبها كويس...
البضاعة ديه بكام في جملتها
طبعا العتبة والموسكي والأسواق ديه مليانة جملة
وفيه مواقع الكترونية دلوقتي كتيرة بتبيع الحاجات ديه جملة
بس لازم تعرف كمان هتشحنها بايه وبكام لغاية مخزنك... هتخزنها فين وبكام
وسعرها في السوق قطاعي بكام عشان تحسب الفرق
لإن لسة في مصاريف تسويق وتصميمات وموقع
فلازم تحسب كل ده عشان تشوف هتجازي معاك ولا لا, هتكسب مكسب كويس مناسب ليك ولا لا
كمان لازم تحسب شكل المرتجعات والخسارة بتاعته
ولو البضاعة ديه قاعدة للسنة الجاية مثلا نسبتها قد ايه, ولا المنتج ده له تاريخ صلاحية وهينتهي بعد شهرين
شكل التسعير بتاعك هايكون سهل يعني بضاعة بجنيه وعليها جنيه مكسب وكده تمام ومش هتخسر لو قعدت
ولا اخلي المكسب ٢ جنيه عشان اعرف اعمل خصم في اخر الموسم وماخسرش كتير
كل ده مهم جدا

شوف الفيديو وانت بتقرأ المقالة

طبعا في ناس بتعرف تصنع.. أو تعرف مصنع بيصنع وتتعامل معاه... وده افضل من تجارة الجملة في بعض الأحيان
نقول تاني تحسب برده الشحن والتخزين والتسويق ولو فيه مرتبات.... كل ده مهم جدا
هنا برده نقطة مطروحة للأسئلة اللي هنتظرها منكم ان شاء الله
... بس فيه سؤال مهم.. ازاي اختار منتجي
اول حاجة لازم تحدد قطاع تكون فاهم فيه كويس... وتشوف ايه اللي ماشي اليومين دول
خصوصا في أيام الكوارث والاوبئة فيه نشاط غير مسبق للناس على شراء حاجات معينة
اي حاجة متعلقة بالطعام
الترفيه المنزلي
الاتصالات والهواتف....ليا صديق باع في أول أيام الحظر اكتر من ١٥٠٠ سماعة في يومين
لازم تركز على اللي محتاجه العميل دلوقتي وتشوف هو ممكن يصرف فلوسه في ايه وبعد كده تفكر تشتريه
زي مثلا ملابس البيت خدت وضعها دلوقتي وبقت تتباع اكتر من الاول لان الواحد بقى بيقضي وقت اكتر في البيت
رمضان داخل... الناس عاوزة تعيش رمضان... هتجيب ياميش وتمر وكل الحاجات اللي بتتعمل في البيت
حاجات المطبخ زاد الطلب عليها كله بقي بيطلب
الاكل المجمد اللي نص سوا
حاجات كتيرة جدا لو ركزت هتعرف احتياج العميل ليها اليومين دول
بعد ماعرفت المنتج وسعرته كويس وهل ينفع يتباع دلوقتي مثلا في ظل الظروف ديه ولا مش هينفع
لازم تعرف حجم بيع المنتجات ديه
شريحة كبيرة بتشتريه؟ ولا قليلة
هل الناس ديه قادرة على الدفع؟ وامتي بتشتري
يعني مثلا بيشتري لبس على العيد
بيشتري ياميش رمضان قبل رمضان
فلازم تعرف المنتج بتاعك بيبتاع ازاي وامتي
كيفية شحنه للعميل وكام مصاريف الشحن
احنا بنتعامل مع شركات كتيرة جدا زي بوسطا و سمارت دليفري وبنعرف نجيبلك سعر ممتاز في الشحن...ديه سهلة جدا نرد عليك فيها
وتشوف كمان وسائل الدفع بالفيزا مثلا
فوالا هي شريك ذهبي لبنك مصر وفوري
في كام ساعة ممكن يبقى عندك حساب من دول وممكن بالبطاقة في فوري
انتظرونا مع الفيديو اللي جاي عن بناء ال Ecommerce website وايه الخصائص اللي محتاجها فيه